انشودة الرعيان

من طرف **عزمي بنات** السبت يونيو 06, 2009 5:08 am

يا زيتون يلي مزين ديرتنا
خلينا نغني لأهل قريتنا
ويا راعي يا بو الناي واليرغول
غنيلي ع نغمة زريف الطول
(يا زريف الطول سلم ع الحبيب
ــــ وخبره اني على غيابه غريب
علتي بالصدر ما إلها طبيب
ــــ إلا برجوع الأهل ع ديارنا)
ونجوم الليل تسهر فوق خيمتنا
وتطرب على لمتنا وجمعتنا
ويا راعي ميل علينا ميل
صبايا الحي بتغني ع لغزيل
(يا اغزيل شو سوينا
ـــ الغربة طالت علينا
خبرهم يا راعينا
ـــ عن قلوب معذبا)
يا حمام يا معشعش بطاقتنا
صبرنا كثير بلكي هاذنت حرقتنا
مشينا دروب والجمرة على الجمرة
يا راعي عودتا نغني على الجفرة
(يا شوفت شفتها
ــ بتصيح يا إمي
نذل ما بوخذ نذل
ــ او سيحوا دمعي
يحرم علي الفرح
ــ ما دمتو عة)
وزغاريد فنيهن يا جارتنا
ما عدنا نخاف لما نقول كلمتانا
يا راعي يا ماشي هونا وهونا
أمانة عليك ما شفتلي دلعونا
(هاي دلعونا عذبتي قلبي
أــــ نا واياك ببلاد الغربة
نذرن علي نذر يا ربي
ــــ أن عادت دلعونا لهز الكونا)
ويا حصاد دير بالك ع غلتنا
ع بيدر جودتا تكمل حكايتنا
خير كثير وتوكل على الله
وراعي الغنم نغماته على العلا
(يا علا القمح بيدر
ـــ وأنا حصدته بأيدي.... علا
وقضيت العمر أسهر
ـــ ع أرض أبوي وسيدي... علا))
ويا حادي الدار اتحنجل بساحتنا
سنين كثار وما اسهرنا بسحجتنا
ويا راعي دقلي ع الشبابا
سكابا دموعنا من بعد لحبابا
(سكابا يا دموع العين سكابا
ــ هجرهم حمل لقلبي عذابا
سنة وسنتين بستنا الحبابيب
ـــ لحتى تقطعوا اوتار الربابا)
ويا راعي بارض المرج عزبتنا
على الله تعود وتتجمع عشيرتنا
ويا راعي سرج وفوق لتلال
تغنيلك يا حلالي ويا مالي
(راعي الغنم خلي الجبل
ـــ يرقص ع نغمات الحنين
يا حلالي يا مالي
خلي الأمل يبني أمل
ـــ يمحي لعثرات السنين
يا حلالي يا مالي
راعي الغنم خلي القصب
ـــ يرجع لماضينا الأمين
يا حلالي يا مالي
مبكرة الفجر عل بلادنا
ـــ من فوق قريتنا يبين
يا حلالييا مالي
ما دام صاروا اطفالنا
ــ صخور القهر متسلقين)

من طرف **ريهام المصري** الأحد يونيو 07, 2009 10:30 am

تسلم اخي عزمي على الانشودة الرائعة انتظر المزيد

انشودة الرعيان

انشودة الرعيان

رد: انشودة الرعيان