الجانب الأسود للسكر الأبيض

في مثل انجليزي بقول:
يأتي الشيطان على صورة أجمل إمرأة

وكلنا بنعرف اني في عالم الغذاء ما في أحلى من السكر الأبيض اللي طعمه الرائع مستحيل يكون بدون ثمن غالي، وهاظ الثمن هو صحتك، السكر الأبيض مش طعام طبيعي صح انه مصدره طبيعي ولكنه لا يحتوي على أي فيتامين أو أملاح معدنية أو بروتينات أو دهون ممكن تفيد الجسم، هو بس سعرات كربوهيدراتية صرفة وفائضة في نفس الوقت، طبعا كلنا بنعرف إنه السكر بيضر عن طريق تسببه بالسمنة والسكري ولكن السكر بكل جماله الأبيض الخلاب بيجي بقول النا زي دعايات أحد البنوك زمان "ومش بس هيك" السكر بكل قلة حيا راح يطالب بالنواقص منه تيوخذها من الجسم عشان الجسم يخزنه مما يؤدي الي امتصاصها من الخلايا وبالتالي الحاق الضرر بها وخاصة انه احنا بنلهط سكر بكميات خيالية، ومش بس هيك السكر كمان بتنافس مع فيتامين سي على مداخله الموجودة على جدران خلايا المناعة فبيمنع استغلالها من هاي الخلايا وبيخفض مستوى المناعة عشان هيك احنا ما بنستفيد من الليمون لما نرشح لانا بنشربه مع السكر اللي حيعوفه عيشته، ومش بس هيك كل ما نبلبع سكر راح ترتفع كمية الإنسولين مرات عديدة وبكميات كبيرة بتمنع خروج هرمون النمو الضروري لتقوية المناعة و حزتها رحنا وطي على قولة الخلايجة، ومش بس هيك اثبتت الدراسات ارتباط السكر ب ... خذ عندك: غير السمنة والسكري كمان الربو والسرطانات كلها لانو السكر بغذيها وبمنع المناعة عنها "حلوة هاي بمنع المناعة" وقصر النظر والتسوس والتهابات اللثة، وهشاشة العظام لانو بسحب كالسيوم منها، وضعف العضلات، والإكتئاب عند الكبار، وعدم التركيز والنشاط الزائد عند الصغار وهم من غير هالواسطة قرود، وأمراض القلب كلها لانو بمنع حرق الدهون، وبيساعد في زيادة خطورة حصوة المرارة والضغط وزيادة سرعة الشيخوخة، والله اعلم شو كمان ... هسا اكيد واحد راح ينط ويقول بلهجة استفزازية وهو ظامر البس بلاش: "ول!! كل هاظا من السكر وليش كل هالناس ماعليهم شي وكلها بتوكل سكر" السبب هو انه بدها وقت تتبان اضرارها بعدين احصائيا السكري هو مرض العصر وامراض القلب هي السبب الأول "للموت بسبب مرض" واللي ما كانتش معروفة قبل 1900 والسراطانات معبية الدنيا الله يعافي الجميع، وبعدين الواحد فينا بدون مبالغة خلال سنة بكون استهلك شوالين يا شوالين ونص سكر اذا مش اكثر يعني آخر حلاوة وهاي كمية كافية لتسبب مرض وتفري الكبد وتهري البدن، طب والحل يعني بنبطل نوكل؟ مش هيك بس في مصادر للسكر انتا بالغنا عنها وبدكش جميلتها، الشاي تبع صبح ومسا وليل خليه بدون سكر او خففه يا سيدي عالقليلة، البيبسي والغازيات، الكتشاب، الخبز المحلى، الكعك والقرشلة الحلوة الشوكلاطات والعصاير الطبيعية، الشيبس التوفه والملبس والعلكة البوظة والمثلجات، حاول تخففها وتخلي ولادك يخففوها ولو يبطلوها احسن، الحلويات زي البقلاوة والكنافة والهرايس والعوامة لا بد منها طبعا بس مش كل يوم ولا كل اسبوع حاول قللها اكثر، واذا كنت مريض وبتتعالج اقطع السكر تماما وشوف الصحة كيف بتصير، بالنسبة لبدائل السكر مش كلها كويسة وانشالله راح اكتب عنها بموضوع لحالها، في النهاية الله يعافينا كلنا وحبيت اسأل بالله مالموضوع "حلو" ؟

الله يسلمك عمي عجوري
انا خابر الموقع بيمنع اللينكات بس راح أكتبها كمرجع اللي أخذت منها المعلومات من مقالاتها وللعلم هية بالإنجليزي:

آه اذا هيك لأ الموضوع مش منقول ومن اجتهادي الخاص وياريت تشطبو عبارة المنقول في الرد لإنها بتنرفزني مع احترامي لكل اللي بينقلو

حياك الله اخي رامي في ملتقاك ونحن نشكرك على الابداع ونحن نشجع على ذلك وخصوصا عندما يكون الابداع من احد اعضائنا وهذا فخر لنا ونحن نشجع ونستقبل اي كتابة لك لكن يجب عليك توثيق الموضوع باسمك حتى تحفظ حقوقك على محركات البحث ولدينا اشكرك